सृजन प्रकाशन ही केवळ पुस्तके प्रकाशित करणारी संस्था नाही, तर विचार, भावना आणि कृती यांना एकत्र गुंफणारी सांस्कृतिक चळवळ आहे. साहित्य आणि कलामाध्यमांतून सामाजिक जाणीवा जागवणे हा आमचा उद्देश आहे. सखोल चिंतन आणि चिकित्सक वृत्ती निर्माण करण्यावर आमचा भर आहे. केवळ पुस्तकांपुरतेच मर्यादित न राहता चर्चा, परिसंवाद, वाचन चळवळी आणि संवादात्मक कार्यक्रमांद्वारे वाचक, लेखक, कलाकार आणि विचारवंत यांना एकत्र आणण्याचा आमचा प्रयत्न असतो. आमची पुस्तके केवळ मनोरंजनाचे साधन नसून, वाचकांना सामाजिक, सांस्कृतिक भान देणारे दुवे आहेत.

वाचनसंस्कृती ही फक्त एक सवय नाही तर सामाजिक परिवर्तनाची प्रक्रिया आहे, असा आमचा दृढ विश्वास आहे. म्हणूनच आम्ही आशयसमृद्ध आणि काळाशी सुसंगत असे साहित्य प्रकाशित करतो. या माध्यमातून वाचकांच्या सामाजिक, सांस्कृतिक जाणिवांचा विकास करण्याचा आमचा प्रयत्न असतो. ‘सृजन’ हे नियतकालिक या दृष्टीचे प्रतीक आहे. त्यातून आम्ही साहित्य, कला, समाजशास्त्र आणि वर्तमान घडामोडींवर संशोधनपर, विचारप्रवृत्त लेखन वाचकांपर्यंत पोहोचवतो. ही एक सतत चाललेली संवादयात्रा आहे, जिथे प्रत्येक अंक आणि प्रत्येक पुस्तक हे नव्या विचारांचे द्वार उघडते.

सृजन म्हणजे निर्मितीचा आनंद आणि त्या आनंदातून समाजाला जागवण्याची एक सृजनशील धडपड.